CUDIAN, Ivisan Capiz – Pilason ang isa ka lalaki matapos nagluntad ang indi pagkaintindihanay sa Barangay Cudian, Ivisan, Capiz.
Ginkilala ang biktima sakay alias Tito, 76-anyos, kag ang suspek naman sakay alias Nab, 45- anyos nga lunsay residente sang nasambit nga lugar.
Sa interview sang Bombo Radyo kay Police Major Rile F. Villariez Jr., Officer in Charge sang Ivisan Philippine National Police, iya ginpahayag nga magpamilya ang biktima kag ang suspek kun sa diin bangud sa makahulubog nga ilimnon may pagbinaisay nga natabo rason man nga wala sila nagkaintindihanay.
Suno kay PMAJ Villariez Jr., ginhala na sang biktima ang suspek nga maghalin sa iya puluy-an, samtang sa iya paghalin sa lugar ginsundan ini sang biktima nga gintuyo nga lampusan sang metal pipe, apang ang suspek nag depensa gamit ang isa ka kahoy rason man nga igo niya ang biktima kag nakaagom sang pilas sa iya nagkalain-lain nga parte sang lawas, bangud sa pagkaagom sang pilas gilayon naman ini ginrespondihan kun sa diin gindala ang biktima sa pinakamalapit nga pampubliko nga hospital.
Pahayag pa niya mahimo nga malikawan ang kaangay sini nga insidente pinaagi sa pagpalawig sang pasensya kag pilion ang mangin kalmado agud malikawan ang paglala sang sitwasyon kag ang posible nga paghinulsol sa ulihi.
Dugang pa sang natungdan, bangud sa ginatawag nga reglementary period, natigayon nga mangin hilway naman ang suspek.
Sa karon suno sa ginahingyo sang pamilya sang biktima, ila ginpangabay nga sabton sang suspek ang pagpabulong sa ila nasamaran nga himata, sa baylo nga indi naman sila magpasaka pa sang kaso batok sa iya, bangud gusto sang pamilya nga masolbar ini sa maayo nga pamaagi kag mapatuman ang nagakaigo nga responsibilidad sa biktima.
