ROXAS CITY – Pilason ang isa ka persona matapos nga ginaalegar ginlabo sang iya nga bayaw gamit ang katana sa Sitio Riles, Barangay Bolo, Roxas City.
Ginkilala ang biktima nga si Rodel Garcia 38-anyos sang nasambit nga lugar.
Sandig sa inisyal nga imbestigasyon sang mga kapulisan nagaguwa nga nag-ugat ang kinagamo sang magbayaw matapos nga ginkaakig ni Garcia ang tuman ka tunog sang music nga ginapatunog niRowie Cepal 28-anyos sang amo man lugar.
Ginaalegar nga nagpadulong si Garcia sa balay ni Cepal agud sawayon ang tuman katunog nga sonata sang iya bayaw.
Apang, ginaalegar nga nag-angkon sang indi pag-intiendihanay rason nga ginaalegar nga nagkuha sang katana si Cepal kag ginlabo si Garcia.
Bangud diri nag-angkon sang pilas sa natuo nga butkon si Garcia tuga sang pagpanglabo.
Samtang sandig naman sa alegasyon ni Cepal nga nag-guha ini sa ila nga panimalay apang hinali ini nga ginlampusan sang tubo ni Garcia sa likod rasun nga nagbalos ini sang labo.
Lunsay nga ginpadangat sa magkatuhay nga ospital ang mag-bayaw kag padayon sa karon nga ginabulong.
Nahibaluan nga lunsay yara sa impluwensiya sang makahulubog nga ilimnon ang mag-bayaw.
Samtang, ginpahayag naman sang iloy sini nga si Alicia Garcia nga masami nagamaoy si Cepal sa tagsa ka mahubog kag nagapatukar sang music sa tion sang kagab-ihon.
Magluwas diri masami pa ini nagasinggitan kag nagapanghangkat sang inaway sa ila nga barangay.
Dugang pa ni Alicia nga indi man tuman ka hubog ang iya nga bata kag wala sang kamatuoran nga ginlamposan ni Garcia si Cepal.
Apang, nag-angkon sang indi pag-intiendihanay ang magtimbang nga bahin rason nga nagresulta ini sang kinagamo.
Bangud diri, ginaistoryahan pa sang pamilya kun magapasaka sila sang panumbungon batuk sa amo nga suspek.
