ROXAS CITY – Pilas sa nagkanari-sari nga parte sang lawas ang na-angkon sang 42-anyos nga lalaki matapos nga ginaalegar ginlabo samtang naga-hampang sang baraha sa sulod sang bilasyonan, takna 12:40 sang kaaganhon, Pebrero 26, 2024 sa Barangay Aganan, Dao, Capiz.
Ginkilala ang biktima nga si alyas ‘Raffy’ residente sang nasambit nga lugar samtang ang ginatudlo nga suspek amu si alyas ‘Hermes’ residente sang Barangay Agcabugao, Cuartero, Capiz.
Sa impormasyon nga nakuha sang Bombo Radyo sa Dao Municipal Police Station, samtang naga-hampang sang baraha ang biktima, hinali nga nag-abot ang suspek nga yara sa impluwensya sang makahulubog nga ilimnon.
Ginapahayag nagbuya sang tinaga ang biktima nga ‘indi mag-intra, karon mahumlad buol mo’ bangud sini, ginkuha sang suspek ang dala nga binangon kag ginaalegar ginlabo si ‘Raffy’ sa nawong kag nawala nga kamot.
Nagresponde sa insidente ang Cuartero Emergency Response Team kag gindala sa ospital ang biktima para sa pagbulong.
Samtang, gilayon nga na-aresto sang mga kapulisan si ‘Hermes’ kag sa karon nagapabilin sa kustodiya sang Dao PNP para sa nagakaigo nga disposisyon.
