ROXAS CITY – Nakitaan sang sintomas sang rabies ang pasyente nga lalaki nga napatay sa banwa sang Tapaz.
Suno kay Dr. Cheyslee C. Descalsota, Veterinarian III sang Office of the Provincial Veterinary sang ma-interview sang Bombo Radyo, gintuad sini nga duha ka separado nga insidente nga ginkagat sang totoy nga ido ang amu nga lalaki sa diin nakagat ini sa nawala nga bahin sang kamot kag tiil.
Natabo ini satong tinalikdan nga bulan sang Marso kag pagkatapos sadto nga insidente nakabatyag na sang sintomas sang rabies ang nasambit nga lalaki.
Ginapahayag nga nahadlok ini sa tubig subong man sa hangin ukon malamig kag indi man ini gusto makakita sang sanag.
Dugang pa sini nga wala nagpabakuna batuk sa rabies ang biktima antes paman ini ginpadangat sa Tapaz District Hospital kag gin-transfer sa ospital sa Iloilo agud i-isolate.
Nahibaluan man nga wala nabakunahan ang ido nga nagkagat sa biktima kag suno pa diri nga naka-experyensiya ang nasambit nga ido sang traumatic incident rason nga nagbaylo ang behavior kag mas nag-agresibo ini kun sa diin naglab-ot sa punto nga nagapang-atake na ini sang mga piso sang manok. Gin-atake man sini ang iya duha ka utod nga totoy kag napatay man.
Samtang, ginpatay man ang amu nga ido kag ginlubong.
Sa karon nga tuig, may yara na sang tatlo ka kumpirmado nga ido nga may rabies sa probinsiya kag tatlo ka suspected samtang isa naman ang sa tawo.
