Kuwarta na, nangin bato pa Ini matapos dimalas nga nakita sa CCTV nga ginhungod sunog sang isa ka lalaki sa Brazil ang iya Porsche sports car agud makakuha sang insurance money.
Ginreport nga ang Civil Police sa Paraná, Brazil nagpakig-angot sa isa ka tawo nga nagsiling ginpunggan siya sang armado nga mga sibilyan nga nagsulod sa iya Porsche 911 Carrera antes ini gindala sa nabukid nga duog sang Lapa kag ginsunog.
Suno sa lalaki, nakalampuwas lang siya sa sunog bangud ginguyod siya sang nagalabay nga mga pedestrian nga nakabati sang iya singgit halin sa iya nagadabdab nga salakyan nga nag-angkon man sang paso sa iya lawas.
Ginpahayag man sini sa mga pulis nga indi niya kilala ang mga naghimo sang krimen apang ginpahog pa nila siya nga patyon.
Gilayon naman nga naghimo sang imbestigasyon ang kapulisan kon sa diin nakakita sila sang CCTV sa isa ka farm malapit sa lugar kon sa diin gin-alegar ginsunog ang sports car.
Sang nakakuha sang ebidensya ang mga otoridad, nakibot sila sang natukiban nga ang ginaalegar biktima ang naghimo-himo sang istorya kag nadakpan sa akto ang pagsunog sang iya sports car sa malapit nga parking lot.
Dugang pa nga ginbuyagyag sang imbestigasyon nga ginkawat sang lalaki ang iya salakyan agud makakuha sang insurance money nga nagabalor sang $120,000 USD agud mabayaran ang iya utang sa buhis.
