Isa ka 21-anyos nga lalaki gikan sa Taizhou, Zhejiang Province sa China ang gin-aresto matapos sini mabiktima ang 63 hotels gamit ang peke nga reklamo.
Ang suspek, nga ginkilala sa apelyido nga Jiang, ang nagagamit sang mga mahigko nga butang kasubong nalang sang mga patay nga kuratsa kag kun kaisa nagamit na nga condom agud magpakuno-kuno nga may mga problema sa katinlo ang mga hotel nga ginatiniran sini.
Nagsugod ang modus ni Jiang sadtong Setyembre 2023 sang pilion niya nga gamiton ang iya nga tuition sa pag-travel sa bug-os nga China imbes nga mag-enroll sa unibersidad.
Sa iya padayon nga paggastos, naubos na ang iya kwarta gani naglab-ot ini sa paggamit sang mga “props” agud makapang-blackmail sang mga hotel. Kaupod sa iya nga koleksyon ang patay nga kuratsa, buhok, nagamit na nga condom kag iban pa nga mga patay nga insekto nga ginabutang niya sa mga kuwarto agud magtuga sang peke nga reklamo.
Sa sulod sang 10 ka bulan, masami nga nagasaylo-saylo si Jiang sang hotel, kun kaisa tatlo ukon apat sa isa ka adlaw, para sa iya nga modus. Kinaandan nagapasugot ang mga hotel nga maghatag sang libre nga accomodation ukon refund nga kwarta bilang kabayaran agud malikawan ang negatibo nga publicity.
Sadtong Agosto 8, 2024, nabuking ang modus ni Jiang matapos mag-file sang reklamo ang isa ka hotel manager, nga napiyerde sila sang 400 yuan bangud sa peke nga reklamo sang suspek. Sa bulig sang iban nga hotel, natukiban ang liwat-liwat nga pattern sang iya modus operandi.
Sa imbestigasyon, narekober sa mga pagkabutang sini ang 23 pakete sang patay nga kuratsa, nagamit na nga condom, kag iban pa nga props.
Nagguwa man nga halin Nobyembre 2023, masobra 380 hotel na ang iya nga ginatiniran, kag 63 diri ang iya natunto sang kabug-usan nga 38,000 yuan (masobra 300,000 pesos). Sa karon uyat sang Linhai People’s Procuratorate ang kaso para sa dugang nga legal nga aksyon.
Samtang, nag-angkon sang kaakig nagikan sa mga netizens ang balita kun sa diin madamo ang nagapamangkot sa social media kun paano niya nahimo nga tuntuhon ang mga hotel nang sang amu kadugay kag kun paano niya nagamit ang matrikula nga dapat kun tani para sa iya nga pagtuon.
