Isa ka lalaki gikan sa China ang kampeon sa tumalagsahon nga kompetisyon sa Baotou City, Inner Mongolia, matapos nga naghigda sa kutson sa sulod sang 33 ka oras nga wala nagabangon ukon nagagamit sang kasilyas.
Ang paindis-indis ang ginhiwat sang Nobyembre 15, gintambungan sang 240 ka mga tawo. Naghalin ini sa popular nga slang sa internet sa China nga “tang ping”, nga nagatuhoy sa pag-untat sa sobra nga pagtrabaho kag pagpili sang mas relax nga estilo sang pagpangabuhi.
Simple lang ang pagsulundan: ang mga partisipante kinahanglan magpabilin nga naghigda sa kutson. Ginapahanugutan sila nga magligid, magbasa, magkaon, ukon maggamit sang smartphone, apang hugot nga ginadumilian ang pagtindog kag pagkadto sa comfort room.
Pagkatapos sang 24 ka oras, 186 ka mga contestants ang gilayon nga gin-eliminate ukon nag-untat. Samtang nagadugay, nangin mas estrikto ang mga pagsulundan tubtob nga pila na lang ang nabilin.
Sa katapusan, ang contestant nga naglawig sang 33 ka oras kag 35 minutos ang nagdaug.
Apang, gin-ako sang winner nga naggamit siya sang diapers agud indi magkadto sa banyo, isa ka stratehiya nga gingamit man sang iban nga mga contestants gani wala ini makabig nga paglapas sa pagsulundan.
Nagdala pauli ang kampeon sang premyo nga 3,000 yuan (masobra P24,500). Ang ikaduha nga pwesto nakakuha sang 2,000 yuan, kag ang ikatlo nga pwesto nakakuha sang 1,000 yuan.
Ang kompetisyon nangin popular sa China, sa diin 10 milyon ka tumalan-aw ang nagtan-aw sang live stream sini.
