Isa ka French salesman kag entrepreneur ang nangin isa ka “human billboard” sa iya kaugalingon nga kasal pagkatapos nga ginbaligya ang espasyo sa iya tuxedo jacket para sa advertisement agud mabayaran ang ila mga galastuhan.
Madugay na nga handom ni Dagobert Renouf nga pakaslan ang iya nobya nga si Anna Plynina. Apang gin-ako sini nga “completely broke” siya kag halos wala na sang puluy-an rason nga indi sila makapatigayon sang nagakaigo nga kasal.
Bangod sang determinasyon, nag-post siya sa X (Twitter anay) sang Hulyo, kag gin-anunsyo nga nagabaligya siya sang mga advertising slot sa suit nga iya isuksok. Nag-viral ang iya post.
Sa katapusan, 26 ka mga startup nga mga kompanya ang nagbakal sang slot, kag nakatipon siya sang kabug-usan nga $10,000.
Sang Oktubre 25, sanday Dagobert kag Anna nagpakasal sa atubang sang 16 ka bisita. Nagsuksok si Dagobert sang jacket nga puno sang logo sang 26 ka mga kompaniya nga nagbulig sa ila.
Magluwas sa madinalag-on nga pag-asawahay, may mas maayo pa nga natabo. Bangod sang iya dedikasyon kag pagkadiskarte, ang isa ka negosyante nga nakakita sang iya ginhimo nagdayaw kag gintanyagan siya sang trabaho sa isa ka startup nga kompanya sa New York.
