Napatay ang 35-anyos nga lalaki sa Chhattisgarh, India matapos nagtulon sang buhi nga piso (chick), nga ginapatihan kabahin sang ritwal agud matuman ang iya handom nga mag-angkon sang anak.
Ginkilala ang biktima nga si Anand Yadav, residente sang Chhindakalo, Ambikapur. Suno sa reportt, hinali na lamang ini nalipong sa ila nga balay bangud sa sobra nga pagpalanakit sang tutunlan kag nabudlayan sa pagginhawa.
Sang gindala sa ospital, gindeklarar ini nga dead on arrival sang mga doktor.
Sa ginpatigayon nga autopsy, natukiban ni Dr. Santu Bag ang isa ka piso nga may kahabaon nga 20 sentimetros nga nakabara sa iya trachea kag esophagus, rason agud mabudalayan ini nga magginhawa kag magtuga sang suffocation.
Suno kay Dr. Bag, ini ang labing-una nga kaso sa iya career.
Sandig sa panaysayon sang mga residente kag himata ni Yadav, masami ini nga nagapadulong sa isa ka babaye nga nagapatigayon sang mga ritwal bangud 15 ka tuig na ini nga nagatuyo nga mag-angkon sang anak.
Sang matuman ang iya handom, ginaangut niya ini sa ritwal nga ginpatigayon sa iya.
Makaligad ang pila ka adlaw, nagbakal si Yadav sang itom nga piso kag gintulon niya nga buhi bilang pagpasalamat kag diri na nagsugod ang trahedya.
Ginpanugyanan naman sang mga doktor kag eksperto ang publiko nga likawan ang mga pagpati nga indi sandig sa siyensiya kag indi magsalig sa mga ritwal agud bulungon ang ginabatyag.
Suno kay Dr. Dinesh Mishra, isa ka doktor nga nagapakamalut sa mga daan nga panimad-on, importante nga magpangayo sang bulig sa mga medical professional imbes nga magsalig sa mga indi daan nga pagpati.
Ginaimbestigaran na sa karon sang pulisya ang insidente, kalakip na ang mga posible nga tawo nga nagtulod sa biktima nga magtulon sang buhi nga piso.
Suno naman kay Yogesh Patel, hepe sang pulisya sang Ambikapur, tinutuyo nila nga matumod ang ginsuguran sang amu nga hitabo agud matapna ang paglapta sang makatalagam nga hilimuon.
