Sa baylo nga magpadayon sa pagpangita sang trabaho, ginpili sang isa ka lalake sa Russia nga maghimo sang krimen kag mapriso agod masiguro nga may libre siya nga puluy-an kag pagkaon kada adlaw.
Suno sa report, ang lalaki nga ginkilala lamang kay “Oleg”, nga naga-edad sang 20 anyos kag nakaagi na sang serbisyo militar, naka-eksperyensya sang tuman nga pagkadesperado pagkatapos sang serye sang napaslawan ini nga makakita sang trabaho sa syudad sang Ufa.
Bangod wala sang kuwarta kag wala sang maistaran, naghimo siya sang plano agod dakpon ang mga pulis.
Una ini nga nagkadto sa isa ka hotel kun sa diin ginkandaduhan niya ang iya kaugalingon sa isa ka hulot kag ginpahog nga palukpon ang iya sini nga backpack, apang wala nagpati ang mga staff.
Wala mag-untat si Oleg kag nagdiretso sa isa ka terminal sang airport.
Diri, nangin hysterical siya kag nagsinggit nga may bomba siya.
Sang natalupangdan sang mga security personnel nga wala sang alambre ukon detonator sa iya bag, gilayon ini nga gindakop kag ginturn-over sa kapulisan.
Pagkatapos sang psychiatric evaluation nga napamatud-an nga maayo ang iya panghunahuna, ginpamatbatan siya sang korte sang tatlo ka tuig kag duha ka bulan nga pagkapreso sa isa ka penal colony, nag-entsakto gid sa iya plano nga makatigayon sang puluy-an kag garantisado nga pagkaon makaduha ka beses kada adlaw.
