Kun kaisa ban sa inyo nagakatak-an man kun malawig ang pag-abot sang inyo order ilabi kun pagkaon ang istoryahan?
Pero kabay pa nga palawigon niyo pa gid ang inyo pasensya.
Bangud didto sa Spain, isa ka lalaki ang gindakop sang mga kapulisan matapos nya ginsunog café bangud nga wala ini sya mahatagan sang staff sang mayonnaise bangud nga naubos na. Natabo ang insidente sa Los Palacios y Villafranca, Seville.
Ang suspek, nga yara sa edad nga 50, nagkaon kaupod ang iya nga bata sang nagpangayo ini sang mayonnaise para sa iya nga sandwich.
Sang ginsiling sang duha ka mga waiter nga wala na sila sang mayonnaise, naakig ini kag naglakat. Apang, imbes kuntani nga magpauli, nagpadulong ang amo nga lalaki sa isa ka sa gasoline station kag nagbakal sang gasolina, kag nagbalik sa café. Liwat siya nga nagpamangkot kun may yara na sila sang mayonnaise, kag sang nagpamalibad liwat ang staff, ginbubo niya ang gasolina sa cafe kag ginsindutan.
Puno sang mga customer sang amo nga tion ang cafe, kag tanan nagdalalagan paguwa.
Madasig nga napalong sang mga empleyado ang kalayo gamit ang mga fire extinguisher, nga nagresulta sa gamay nga damage.
Gilayon man siya nga gindakop sang mga pulis kag sa subong nagahulat sang iya nga penalidad. Gani kun ikaw ang akig, indi gid maghimo sang desisyon nga hinulsulan mo lang.
