Dakop ang isa ka street level individual matapos madakpan sa ginkasa nga buy-bust operation sang kapulisan sa Brgy. Punta Tabuc, Roxas City .
Ang subject person amo si alyas Mon, 45-anyos, tricycle driver kag residente sang Brgy. IX, Roxas City, kag lakip sa Provincial Priority Target List sa probinsya sang Capiz
Sandig sa impormasyon nga nakuha sang Bombo Radyo sa Roxas Component City Police Station, ginpatigayon ang operasyon sa idalum sang ila Station Drug Enforcement Team kun sa diin nagresulta ini sa madinalag-on nga pagdakop sa subject person.
Nakuha sa operasyon ang ginabanta isa ka gramo sang ginapatihan shabu nga may street drug price nga nagalab-ot sa kapin 6,800 pesos, lakip na ang buy-bust money.
Gilayon man nga gindala sa Roxas Component City Police Station ang subject person para sa nagakaigo nga disposisyon kag magapangatubang sang kaso nga paglapas sa Republic Act 9165 ukon Dangerous Drugs Act of 2002.
Sa subong, nagapadayon ang imbestigasyon sang kapulisan agud mahibaluan pa ang posible nga mga kaupod sang natungdan sa transaksyon sang ilegal nga druga sa lugar.
