Ginsuspendir sang Land Transportation Office (LTO) ang lisensya sang driver nga imbolbado sa fatal nga aksidente sa Ninoy Aquino International Airport (NAIA) Dominggo sang aga. Ginmanduan man sang Department of Transportation (DOTr) nga ipaidalom sa drug test ang driver sang SUV.
Suno sa LTO, temporaryo nga ginsuspender ang driver’s license sa sulod sang 90 ka adlaw samtang gina-imbestigaran ang insidente.
Base sa Anti-Drunk and Drugged Driving Act of 2013, ang mga driver nga nadalahig sa aksidente ang obligado nga magpaidalom sa chemical testing, lakip na ang drug screening. Kun magpamalibad sila, mahimo nga bawion ang ila lisensya kag mahimo sila multahan.
Nahibaluan nga duha ka tawo ang napatay sa aksidente—isa ka 28-anyos nga lalaki kag isa ka lima ka tuig nga bata sang nag-arado ang isa ka SUV sa departure area sang NAIA Terminal 1. Tatlo pa ang napilasan kag gindala sa ospital.
Nagpaguwa man sang show-cause order ang LTO batok sa rehistrado nga tag-iya sang salakyan. Ginmanduan ang driver nga i-surrender ang iya lisensya sa labing madali nga panahon.
