SIGMA, CAPIZ- Nagapadayon ang road inspection kag apprehension operation sang mga katapo sang Land Transportation Office, kaupod ang Highway Patrol Group kag mga katapo sang Public Order and Safety Unit-Sigma sa banwa sang Sigma, Capiz.
Sa interview sang Bombo Radyo kay Ms. Riza Otayde, District Chief sang Land Transportation Office (LTO) Dumalag, iya ginpahayag nga sa gihapon madamo sang mga motorista ang nagabyolar sa ordinansa nga ginapatuman sa amo nga banwa partikular ang ‘Speed Limit Ordinance’.
Dugang pa niya, magluwas sa pagbayolar sa amo nga ordinansa, may yara man sang iban pa nga mga bayolasyon nga ginakalakipan sang mga wala marehistro nga behikulo, wala gasuksok helmet, wala gatakod sang seatbelt, wala lisensya kag inappropriate driver’s license code sa diin nga nagaka-isyuhan sang Temporary Operators Permit kag nagakapenaltihan.
Nahibaluan nga ang ‘Speed Limit Ordinance’ sa banwa sang Sigma ginpatuman agud mapahagan-hagan ang kaso sang aksidente sa dalanon kag nagsugo ini sang Hunyo 1, 2025.
Panugyan naman ni Otayde sa mga motorista nga kinahanglan nakarehistro ang tagsa ka mga behikulo, may driver’s license kag magsunod gid sa mga layi trapiko nga ginapatuman agud malikawan nga ma-ticketan.
Interviewed by Bombo Francis Biñas
