Nagpahanumdom ang pinuno sang Land Transportation Office (LTO) sa publiko nga maghalong sa mga dalanon kadungan sa pag-obserbar sang Semana Santa.
Sa interview sang Bombo Radyo kay Atty. Allan Sacramento, Officer-in-Charge sang LTO, Roxas City, importante nga mangin preparado ang mga motorista antes magbyahe.
Suno kay Sacramento, dapat siguraduhon ang nagakaigo nga kondisyon sang salakyan kaangay sang preno, suga, signal lights, kag goma.
Naghingyo man ini sa mga motorista nga magpakita sang pasensya sa dalanon bangud sa ginalauman nga pagdamo sang mga salakyan.
Ginhatagan man sini sang importansya ang pagsunod sa traffic rules, paglikaw sa pagmaneho kon kapoy ukon nakainum, kag proper trip planning agud malikawan ang disgrasya.
Kadungan sini, ipatuman man sang Land Transportation Office ang “Oplan Biyaheng Ayos” agud masiguro ang kaluwasan kag katawhay sang mga nagabiyahe.
Dugang pa niya nga ang disiplina kag responsable nga pagmaneho importante agud masiguro ang kaluwasan sang tanan sini nga Semana Santa.
