ROXAS CITY – Patay na sang masapwan ang isa ka laon nga lalaki sa sulod sang iya nga balay sa Sitio Tag-aw, Barangay Bungsuan, Dumarao, Capiz.
Ginkilala ang biktima kay Melchor Hinguilo, 58 anyos kag residente man sang nasambit nga lugar.
Ginpahayag ni Police Captain Larnel Frial nga sandig sa imbestigasyon sang Dumarao Municipal Police Station, naglabay ang isa ka residente sa balay sang biktima sang may nasimhutan ini nga mabaho sa amo nga balay.
Sa iya pagtsekyar, nakit-an sini ang biktima nga nagakulob nga wala na sang kabuhi kag may nakahigot nga pisi sa liog.
Mahibaluan nga posible nga nautod ang pisi nga ginhigot sang biktima sa sulod sang iya balayan rason nga yara na ini sa salog sang ini ang nakit-an kag yara na sa state of decomposition.
Mahibaluan nga nagaisahanon na lamang ang biktima sa iya balay kag madugay na ini may ginabatyag nga balatian.
