Lapsag gin-abandonar sang iloy, ginbilin sa guwa sang gate sang isa ka balay

ROXAS CITY – Isa ka lapsag nga babaye nga may pusod pa kag naputos sa lampin ang ginbilin sa guwa sang gate sang isa ka balay sa Jimenez road, Barangay Mongpong, Roxas City kaina sang kaaganhon.

Nagpanawag sa Roxas CIty PNP ang tag-iya sang isa ka balay matapos ila nabatian ang hibi sang isa ka lapsag sa guwa sang ila nga gate.

Wala nagguwa ang tagbalay para tsekyaron ang nagahibi nga lapsag kun wala nag abot ang mga pulis kaupod ang CERT sa pagkabalaka nga modus operandi ini sang mga persona nga may malain nga tuyo.

Gilayon nga gindala sa Roxas Memorial Provincial Hospital ang lapsag agud matsekyar sang mga doktor.

Nahibaluan nga nakita ang lapsag sa isa ka balay nga malapit sa balay ni Vice Governor Esteban Nonoy Contreras.