ROXAS CITY – Daku nga palamangkutanon sa mga residente sang Sitio Terel, Barangay Tanque, Roxas City ang pagkadula sang anum ka bulan nga bata nga babaye nga kaupod nga nagakatulog sang iloy sa ila balay.
Natingala ang iloy ni Baby Xia nga sa iya pagbugtaw wala na sa tupad ang anak rason nga iya ginpukaw ang amau nga natingala man sa pagkadula sang apo.
Nagbulig man sa pagpangita sa bata ang ila mga kainngud balay nga amo man ang nagpangayp sang bulig sa Philippine Coastguard, Bureau of Fire Protection, Philippine National Police, Capiz Emergency Response Team kag iban pa nga grupo.
Nagpanindugan si Lolo Zaldy, lolo sang biktima nga imposible nga mahulog sa buhi sa ila balay ang apo, bangud tuman ka gamay sang buho kag indi makaigo ang lawas sang bata.
Bangud may panagupnop ang pamilya Ontayao nga indi normal ang pagkadula ni Baby Xia, nagpatawag sila sang albularyo nga nagsiling nga ginkuha sang ginapatihan mag-asawa nga aswang ang lapsag.
Matapos itudlo ang balay sang ginapatihan aswang gilayon nga nagpadulong ang pamilya kaupod ang ila mga tupadbalay kag mga pulis apang wala sang naabtan nga tawo sa balay sang mag-asawa nga ginasiling may ginkadtuan.
Apang wala nagdugay nagbalik ang mga tawo bangud nakita na ang lapsag sa idalim sang balay sang isa ka pamilya.
Gilayon nga gindala sa ospital si Baby Xia apang gindeklara ini nga dead on arrival sang doktor.
Samtang wala nagabag-o ang pagpati ni Lolo Zaldy nga ginkuha sang aswang ang iya nga apo, bangud makatilingala nga matapos magtuga sang gahud kasubong sa pagpatik patik ang mga tawo santu sa ginpalayag sang albularyo, hinali nga nakita ang bata sa lugar sa diin una nga ginpadulungan sang mga tawo nga nagbulig sa pagpangita sa biktima.
