Nagpaandam ang Philippine Atmospheric, Geophysical and Astronomical Services Administration (PAGASA) nga duha ka weather system nga amo ang Intertropical Convergence Zone (ITCZ) kag easterlies ang magadala sang magal-umon nga kalangitan kag pag-ulan sa pila ka bahin sang pungsod sa masunod nga 24 oras.
Base sa weather forecast sang PAGASA kahapon nga Dominggo, ang mga rehiyon sang MIMAROPA, Visayas, Zamboanga Peninsula, Caraga, kag Northern Mindanao ang maka-eksperyensya sang magal-umon nga kalangitan nga may lapta-lapta nga pag-ulan kag pagpanaguob dala sang ITCZ nga mahimo tunaan sang flash floods ukon landslides.
Suno sa state weather bureau, ang nabilin nga bahin sang Mindanao ang may yara sang medyo magal-umon tubtub magal-umon nga kalangitan nga may panalagsa nga pag-ulan bangud sang ITCZ.
Samtang, ang Metro Manila kag iban pa nga bahin sang Luzon ang maka-eksperyensya sang medyo magal-umon tubtob magal-umon nga kalangitan nga may isolated rain showers ukon thunderstorms tuga sang easterlies.
Ang weather bureau nagapaandam nga ang mabaskog nga mga pagdaguob mahimo nga tunaan sang flash floods ukon pagtiphag sang duta.
Kasarangan tubtob mabaskog nga hangin kag kasarangan tubtob mabalod nga kadagatan ang mabatyagan sa extreme Northern Luzon, samtang mahina tubtob kasarangan nga hangin kag kasarangan tubtob medyo mabalod nga kadagatan ang maeksperyensiyahan sa nabilin nga bahin sang pungsod.
