MAMBUSAO, CAPIZ- Natigayon nga nataban sang wala pa magkilan-an nga kawatan ang isa ka unit sang laptop kag pila ka mga tablets nga ginpanag-iyahan sang Department of Education (DepEd) nagikan sa Principal’s Office sang Ilawod Elementary School, Barangay Poblacion Proper, Mambusao, Capiz.
Ang biktima amo si Arlyn Luces, 55-anyos, principal sang nasambit nga buluthuan nga residente sang Barangay Bao-bato sa amo nga banwa.
Sa impormasyon nga nakuha sang Bombo Radyo nagikan sa ambusao Municipal Police Station, ginapahayag nga nagpanawag sa ila nga talatapan ang janitor sang amo nga buluthuan agud nga ipahibalo sa ila nga ginsulod ang amo nga principal’s office.
Dugang diri, nagwa sa imbestigasyon sang mga kapulisan nga nag-agi ang amo nga kawatan sa bintana sa diin nga ginpangkakas sini ang mga jalousie kag ginpanglugti ang harang nga mga bakal.
Ginahibalo pa sa subong ang kabug-usabn nga balor sang ginpangtaban sang amo nga kawatan.
Sa subong, nagapadayon ang imbestigasyon sang mga katapo sang Mambusao Municipal Police Station angut sa nasambit nga insidente.
