ROXAS CITY – Viral karon ang picture/laragway sang isa ka bata nga lalaki nga ginabulubanta nagapang-edaron sang tatlo katuig kag nagapanigarilyo na sa Barangay Poblacion, Pres. Roxas, Capiz.
Sa interview sang Bombo Radyo kay Pres. Roxas Mayor Receliste ‘Tanoy’ Escolin ginpahayag sini nga nagahimo na sila sang tikang agud nga pasabton ang ginikanan kag marescue ang nasambit nga menor de-edad.
Ginpahayag ni Escolin nga ang mismo ang ginikanan sang bata ang nag post sang mga laragway sa social media kun sa diin ginapabugal pa sini nga nagapanigarilyo kag nagainom ang iya anak.
Bangud diri, gilayon nga ginpatawag sang alkalde ang talatapan sang Municipal of Social Welfare and Development Office ukon MSWDO kag Philippine National Police agud nga matul-id kun sa diin nagapuyo ang nasambit nga menor de edad.
Dugang pa ni Escolin nga gilayon man nila nabal-an kun sa diin nagaistar ang ginikanan kag ang bata kag gilayon ini nga ginpatawag sa ila barangay.
Suno sa ginikanan sang bata nga posible nahimo niya lamang ini bangud man sa problema nila sang iya bana kag wala gid ini nagalaom nga mag viral rason nga nagapangayo gid ini sang pasaylo sa alkalde.
Apang, ginpasiguro ni Escolin nga dapat manabat gid ang ginikanan bangud sa indi tama nga pagpadaku kag indi ordinaryo nga buluhaton nga ginhimo nila sa bata.
Magluwas diri, dugang pa sang alkalde nga lakip man sa pasabton ang mga indibidwal nga kaupod sang bata sa picture subongman ang nagahawid sang cellphone.
Sa karon, padayon ang ginapatigayon nga imbestigasyon sang mga natungdan nga ahensya angut sa indi maayo nga ginhimo sang isa ka ginikanan nga kasubong ginapabugal pa sini ang pagpanigarilyo kag pag-inom sang iya anak.
Mahibaluan nga magluwas diri ginaimbestigahan man nila ang utod pa gid sang bata nga kasubong ginatudloan man sang indi maayo nga mga buluhaton sang iya mga kaupdanan sa panimalay partikular na ang iya ginikanan.
