ROXAS CITY – Patigayunon subong nga adlaw ang launching kag blessing sang “Gugma Para sa Capiz Dialysis Center” nga nahamtang sa Roxas Memorial Provincial Hospital – Lanot, Roxas City.
Kahapon nagpatawag sang paghinun-anon si Governor Fredenil Castro sa mga pasyente kag pamilya sang mga nagapa-dialysis nagikan sa nagkalain-lain nga kabanwahanan sa probinsya sang Capiz kaupod si Dr. Forencio Luching, Chief of Hospital sang RMPH agud ipahibalo ang pagbukas sang nasambit nga dialysis center.
Suno sa gobernador, maayo ini nga balita para sa mga Capizeño ilabi na sa mga indi makasarang bangud wala sang kwarta kag indi maakomodar sang iban nga dialysis center tungod ini ang puno na, apang sa nasambit nga programa nga gindihon sang provincial government may tyansa ang mga Capisnon nga makaagom sang serbisyo nga libre.
Pahayag sang gobernador, wala sang pagabayaran ang pasyente bangud sakop ini sang Assistance to Individuals in Crisis Situation ukon AICS kag Medical Assistance for Indigent Patient ukon MAIP program sang provincial government.
Mahibaluan may yara sang 15 ka dialysis machine ang ginbakal sang probinsya kun sa diin 14 diri ang maga-operate nga maka-atipan sang tubtob 79 ka mga pasyente kag ang nabilin nga isa ang mangin reserba.
Suno pa kay Gov. Castro, nangin posible ang proyekto bangud sa pagtimakas sang gobyerno-probinsyal nga maamligan ang paggamit sang insakto sang kwarta sang pumuluyo sang Capiz tubtob nga nakatipon ini sa pagbakal sang dialysis machine nga wala gin-utang.
Dugang pa sang gobernador nga ila tinguhaan nga sa madali nga tinion nga makakuha sang dugang nga pondo para makahimo sang extension sang dialysis center agud mas madugangan pa gid ang maka-avail ukon ma-cater sang serbisyo sa mga Capisnon.
Maga-operate ang “Gugma Para sa Capiz Dialysis Center” Lunes tubtob Sabado nga adlaw.
