Ginpaathag sang isa law expert ang mga proteksyon nga ginhatag sang Republic Act No. 10932 ukon ang Enhanced Anti-Hospital Deposit Law sa mga pasyente nga nagakinahanglan sang emergency kag serious medical care.
(CEDULLO)
Sa interview sang Bombo Radyo kay Atty. Eve D. Cedullo sang Integrated Bar of the Philippines (IBP) Capiz Chapter, iya ginpahayag nga importante nga proteksyon sang layi ang pagpasiguro nga indi ma-deny ukon ma-delay ang basic emergency care sa pasyente bangud lamang sa kawad-an sang deposit, down payment kag reservation fee.
(PASYENTE)
Suno kay Cedullo, indi buot silingon sini nga libre na ang tanan nga treatment, bangud ang “no deposit” indi nagakahulugan sang “no bill.”
Pahayag pa niya, kun wala sang nagakaigo nga equipment, specialist ukon medical capability ang ospital para sa kondisyon sang pasyente, mahimo ini nga i-transfer sa iban nga medical facility nga may kapasidad sa pag-atipan sa iya kondisyon.
Samtang, may yara man sang legal nga accountability ang hospital officials, medical practitioners kag employees nga magalapas sa mga probisyon sang nasambit nga layi.
Dugang pa sang natungdan, importante ang kabuhi sang tawo labaw sa bisan ano pa nga butang gani nagakadapat nga hatagan sang husto nga pag-atipan.
