Nagpahanumdom ang isa ka law expert sa mga senator-judges sang Senate Impeachment Court nga mangin mahalong sa pagtalakay sang mosyon may kaangtanan sa pagpaguwa sang subpoena para sa bank kag tax records ni Vice President Sara Duterte kag sang iya bana nga si Atty. Manases Carpio.
Sa interview sang Bombo Radyo kay Atty. Elaine Tantengco Bathan, Assistant Dean sang University of San Jose-Recoletos School of Law, iya ginpahayag nga importante nga timbangon sang impeachment court ang kinahanglanon sang ebidensya kag ang mga kinamatarong nga ginaproteheran sang layi, lakip na ang nahanungod sa privacy kag due process.
Suno kay Bathan, may authority ang Senate Impeachment Court sa pagpaguwa sang subpoena kon ini ang kinahanglanon para sa pagdumala sang impeachment trial.
Apang kinahanglan nga mapamatud-an nga ang ginapangayo nga mga dokumento ang may direkta kag klaro nga kaangtanan sa mga Articles of Impeachment nga ginpasaka batok sa bise presidente.
Pahayag pa niya, indi dapat mangin isa ka “fishing expedition” ang pagpangayo sang mga rekord agud malikawan ang posible nga paglapas sa Bank Secrecy Law kag iban pa nga mga layi nga nagaproteher sa pagka-confidential sang financial records.
Dugang pa sang natungdan, importante nga mapabilin ang balanse sa tunga sang pagpangita sang kamatuoran kag pag-angkon sa mga kinamatarong sang tanan nga mga partido agud mapadayon ang kredibilidad kag integridad sang impeachment proceedings.
