Nagpaandam ang law expert nga sa publiko nga sundon ang husto nga proseso sang notarization sang mga dokumento agud malikawan ang mga legal nga problema.
Sa interview sang Bombo Radyo Roxas kay Atty. Marie Claudine Posadas sang Integrated Bar of the Philippines – Capiz , iya ginpahayag nga importante ang personal appearance sang nagapirma kag government-issued ID antes ma-notaryo ang bisan ano nga dokumento.
Suno kay POsadas , ang notarization isa ka legal nga proseso nga nagapamatuod nga ang nagapirma amo gid ang tawo nga unod sa notaryo kag boluntaryo nga nagapirma sang dokumento.
Ini ang rason nga indi dapat pirmahan daan ang dokumento antes magkadto sa notaryo bangud kinahanglan masaksihan mismo sang notaryo ang pagpirma ukon mapamatuoran ang pirma sang affiant.
Pahayag pa niya, kun may nakita nga mga iregulardad ukon may kulang sa dokumento, mahimo nga magbalibad ang notary puiblic sa pag-notaryo ku wala nasunod ang legal nga proseso.
Nagpanawagan naman ang natungdan sa publiko nga magpalapit lamang sa mga lehitimo nga notary public kag siguruhon nga nabasa kag nahangpan anay ang sulod sang dokumento antes magpirma agud malikawan ang posible nga legal nga problema sa ulihi.
