Nagpanindugan ang isa ka law expert nga mabakod nga ebidensya ang testimonya sang hostile witness sang prosecution nga si anay kag Office of the Vice President ukon OVP Special Disbursing Officer nga si Gina Acosta angot sa paggamit kag paggasto sang confidential funds.
Sa interview sang Bombo Radyo kay Atty. Ephraim Cortez, President sang National Union of Peoples’ Lawyers, iya ginpahayag, nga base sa ika-16 nga adlaw sang impeachment trial kay Vice President Sara Duterte, daw kaangay nga indi lang ini simple nga disbursement sang pondo nga ginpagwa niya ang ₱125 million kay Col. Raymond Lachica Lachica.
Suno kay Cortez, makabig ini nga pagsurrender ukon pag-turnover sang daku nga kantidad sang confidential funds kay Lachica, ilabi na nga indi siya ang Special Disbursing Officer nga may yara sang direkta nga katungdanan sa pag-disburse sang amo nga pondo.
Ginpanindugan ni Cortez nga importante nga lantawon kun may yara sang bastante nga legal nga otoridad si Lachica agud magpanguna sa paghimo sang desisyon kag paggasto sang confidential funds nga gintugyan sa OVP.
Pahayag pa niya importante ang amo nga mga pahayag bangud suno kay Acosta nga indi niya matumod ang partikular nga probisyon sang Joint Circular 2015-01 nga nagahatag sang otoridad sa isa ka security officer nga maggasto sang confidential funds.
Dugang pa sang natungdan, diri dapat tutukan sang impeachment court bangud ang pag-angkon sang mando gikan sa isa ka head of agency wala nagakahulugan nga automatic nga legal ang tanan nga pamaagi sa pagpatuman sini.
