Nagpanawagan si Atty. Donie Almio, Law Professor sang University of San Agustin–College of Law, nga mangin mahinalongon sa paghambal, ilabi na sa paghatag sang kritisismo sa publiko.
Ini may kaangtanan sa ikatlo nga kaso nga cyberliber batok kay Cavite Rep. Francisco “Kiko” Barzaga, nga gin-file ni Manila Rep. Rolando Valeriano.
Ang duha pa ka kaso ang una na nga ginpasaka ni Enrique Razon kag NUP chair Ronaldo Puno.
Sa interview sang Bombo Radyo kay Atty. Almio, iya ginpahayag nga kinahanglan gid nga mag “think twice, o think thrice” antes maghambal ukon maghatag sang statement nga may kritisismo.
Ini agud malikawan ang posibleng kaso kag indi mangin pareho sa natabo kay Kiko Barazaga.
Suno kay Almio, Ang wala ginpanumduman nga pahayag ukon emosyonal nga reaksyon ang mahimo magresulta sa legal nga problema.
Ginpahanumdom man sini nga pwede ang kritisismo sa isa ka demokratiko nga pungsod, apang kinahanglan may basehan ini sang kamatuoran, may ebidensya, kag ginahimo sa respetado nga pama-agi.
Nahibaluan nga ginpahayag ni Barzaga sa isa ka post sa social media sa una nga bahin sang sini nga bulan nga gina-alegar nga nagabaton sang suhol ang mga miyembro sang NUP halin kay Razon sa ginpatigayon nga pagtipon-tipon sa Solaire kabaylo sang pagboto kay Romualdez bilang House Speaker sang ika-20 nga Kongreso sang Hulyo.
