Layi nga magaproteksyon sa pumuluyo batok sa online sexual abuse kag paggamit sang AI, ipatuman sa Singapore

Ipatuman na sa Singapore ang bag-o nga mga layi nga nagaproteksyon sa mga pumuluyo batok sa online sexual abuse, kalakip ang paggamit sang artificial intelligence o ai sa paghimo sang sexual content.

Sa idalom sang bag-o nga layi, krimen na ang paghimo sang intimate images, lakip ang AI-generated materials, nga wala sang pagtugot ukon consent sang tawo.

Mahimo mapriso sang tubtob duha ka tuig kag pamultahon ang mga makalapas sini.

Mas mabug-at naman ang penalidad kun menor de edad, ilabi na kun 14-anyos paubos, ang biktima.

Mahimo man makasuhan sa Singapore ang mga suspek nga naga-groom sang mga menor de edad sa iban nga pungsod kag naga-ubra sang sexual offense, kun ang suspek ukon biktima nagbiyahe halin sa Singapore antes natabo ang krimen.