ROXAS CITY – Pabor ang Sangguniang Kabataan Federation President sang Capiz sa ginpirmahan nga layi ni President Rodrigo Duterte nga Republic Act No. 11768 nga naga-amyendar sa SK Reform Act of 2015.
Sa interview sang Bombo Radyo kay Mr. Renzo Teves, SK Federation President, ginpahayag sini nga maayo gid ang nasambit nga layi bangud mapataas sini ang moral sa mga SK kagawad agud mahimo ang ila nga katungdanan.
Mahibaluan, nakasaad sa layi nga magabaton sang indi magtaas sa 25% nagikan sa SK funds sang monthly honorarium sang mga SK Kagawad kag appointees.
Suno kay Teves, sa sini nga layi maganyat ang mga SK member nga indi maghalin sa ila nga katungdanan kag mahuguran nga magtrabaho kaupod ang ila nga Sk chairman.
Magluwas sa monthly honorarium nga mabaton sang SK members, madamo pa ini sang mga benepisyo kaangay nalang sang philhealth kag iban pa. Nagapati naman si Teves nga indi ini makaapekto sa pagserbisyo sang SK kundi mapaayo pa sini ang ila pagtrabaho agud makabulig sa ila nga komunidad.
