Nagtaas sang 10.74 metro ang lebel sang tubig sa Angat Dam sa Bulacan sa nakaligad nga semana, suno sa pinakabag-o nga datos gikan sa state weather bureau.
Halin sa 183.58 metro sang Setyembre 1, nagdangat sa 194.32 metro ang lebel sang tubig sa Angat Dam sang Setyembre 8.
Ang dako nga pagtaas sang lebel sang tubig sang nasambit nga dam ang tuga na man sang mga pag-ulan nga dala sang Bagyong “Enteng” (Yagi) kag habagat nga ginpakusog sang bagyo.
Apang, apisar nga may pagtaas sa lebel sang tubig, kinahanglan pa sang dam sang dugang nga 15.68 metro agud maabot ang normal high water level nga 210 metro kag masiguro ang bastante nga suplay sang tubig sa masunod nga tig-ilinit.
Ang Angat Dam, ang nagahatag sang 98% nga suplay sang tubig sa Metro Manila.
Samtang, kalabanan sa mga dam sa Luzon ang nakabatyag man sang amat-amat nga pagtaas sa mga lebel sang tubig tuga sang mabaskog nga pag-ulan sang nakaligad nga semana.
