Ginbali sang legal counsel sang pamilya Locsin ang nangin akusasyon sang alkalde sang President Roxas nga isa ka sahi sang harassment ang ginpadala nga demand letter sa mga stall owners sa merkado publiko kag sa Local Government Unit sang nasambit nga banwa.
Ginpahayag ni Atty. Vincent Atlas Catalan, may balasehan ang pagpadala sang demand letter sa mga natungdan kag indi ini makabig nga harassment.
Ini bangud suno kay Catalan nga ginabawi lamang sang pamilya Locsin partikular sang iya kliyente nga si Doña Luisa Consing Locsin ang duta nga ginapanag-iyahan sang ila pamilya.
Ginpanindugan pa sang abugado nga wala man naga-exister ang ginasiling deed of donation nga yara sa kostodiya sang LGU sang President Roxas bangud natapos lamang ang ginpatigayon nga pre-trial wala ginpresentar ang amo nga dokumento sa korte.
Ginhangkat pa sini ang LGU kun matood nga may ginauyatan sila nga deed of donation, kinahanglan na nila ini nga ipaguha.
Nahibaluan man gikan kay Catalan nga nag-oponer sila sadto sa konstruksyon sang bag-o nga merkado publiko sa duta sang pamilya Locsin kag nagproposed nga gamiton na lamang ang P100 million nga loan sa pagbakal sang duta kag pagpatindog sang public market.
Ginklaro man ni Catalan nga indi ang LGU sang President Roxas ang nagapanag-iya sang duta nga ginatindugan sang merkado publiko kundi ang pamilya Locsin./
Kun sundon gid suno sa abogado nga makadto sa pamilya Locsin ang ginabayad sang mga stall owners kag indi sa LGU.
