Liwat nga ginpanindugan sang legal defense ni Former President Rodrigo Roa Duterte nga wala na sang hurisdiksyon ang International Criminal Court (ICC) sa pag-imbestigar sang mga kaso kriminal sa Pilipinas matapos ang pag-withdraw sang pungsod sa Rome Statute sadtong 2019.
Sa legal filing nga ginsumiter sang Enero 23, 2026, ginpahayag sang defense lead counsel nga si Atty. Nicholas Kaufman nga maathag sa Rome Statute nga ang isa ka estado dapat mangin katapo sa tion nga ang korte magdesisyon sa paggamit sang iya hurisdiksyon.
Suno sa iya, kun ang isa ka pungsod indi na miyembro sa tion sang pagtugot sang imbestigasyon, wala ini sakop sang hurisdiksyon sang ICC.
Ginpamatukan man sang kampo ni Duterte ang panan-awan nga bastante na ang preliminary examination agud makasugod sang legal nga proseso, kag ginpanindugan nga kinahanglan ang pormal nga imbestigasyon nga gin-aprubahan sang Pre-Trial Chamber sang ICC, nga ginhatag lamang sang Setyembre 2021 ukon duha ka tuig matapos nga nag-withdraw ang Pilipinas sa kasugtanan.
Matandaan nga gin-aresto si Duterte sang Marso 11, 2025 pag-abot halin sa Hong Kong matapos nagpaguwa sang arrest warrant ang ICC may kaangtanan sa imbestigasyon sa kontrobersyal nga kampanya kontra droga sang iya administrasyon, kag gindala ini sa The Hague, Netherlands agud pormal nga mag-atubang sa mga hearing sa korte.
