Ginpakigbahin sang isa ka legal expert nga importante nga magsunod sa nagakaigo nga legal nga proseso ang mga tag-iya sang propiedad sa pagpatuman sang ejectment batok sa mga tenant nga wala na sang katungdanan nga magpabilin sa ila nga lugar.
Sa interview sang Bombo Radyo Roxas kay Atty. Roland Manuel M. Alado sang IBP Capiz Chapter, iya ginpahayag nga ang ejectment amo ang legal nga proseso sa pagpaguwa sang tenant , kag mahimo ini sa paagi sang forcible entry ukon unlawful detainer, depende sa sitwasyon sang pag-okupar sang propiedad.
Suno kay Alado, antes makapasaka sang ejectment case, kinahanglan nga masunod anay ang mga kinahanglanon lakip ang paghatag sang nagakaigo nga demand to vacate agud mahatagan sang nagakaigo nga tion agud maghalin sa husto nga pamaagi.
Nagpahanumdom nan ang natungdan nga mangin klaro sa lease agreement kag maghatag sang respeto sa tagsa ka kinamatarong kag obligasyon agud malikawan ang mga indi maayo nga pagsinabtanay sang duha ka panig.
