Nagapati ang isa ka legal expert nga mabaskog ang testimoniya ni Atty. Alex Cabrera, nga nangin prosecution witness sa impeachment trial ni Vice President Sara Duterte, may kaangtanan sa alegasyon sang unexplained wealth.
Sa interview sang Bombo Radyo kay Atty. Ephraim Cortez, President sang National Union of Peoples’ Lawyers, iya ginpahayag nga na-eksplikar ni Cabrera sang maayo ang mga dokumento nga may kaangtanan sa ginapatigayon nga pag-usisa sa financial record ni Duterte.
Suno kay Cortez, importante ang mga dokumento nga ginpresentar kag gin-usisa ni Cabrera bangud amo ini ang basehan sang iya mga konklusyon sang analysis.
Dugang pa ni Cortez, indi dapat madula ang kredibilidad sang testimoniya ni Cabrera bangud lamang sa mga isyu nga mahimo magtuhaw, bangud ang iya mga pagpahayag nakabase sa mga dokumento nga iya gin-usisa.
