Nagapati ang isa ka legal expert nga indi appealable issues ang request sang kampo ni former President Rodrigo Duterte matapos gin-reject sang International Criminal Court (ICC) Pre-Trial Chamber I ang hingyo sang iya nga defense team nga makaapelar sa desisyon nahanugod sa pagpangayo sang komunikasyon sa tunga sang ICC Registry kag sang panel nga gin-assign sa medical examination para sa anay presidente.
Sa interview sang Bombo Radyo kay Atty. Joenar Pueblo, President of the Philippine Arbitration Center in the Visayas, iya ginpahayag nga ginapahanugotan sang Rome Statute ang kampo nga mag file sang motion kadungan sang hearing apang indi tanan nga rulings ang mahimo nga maapelar.
Suno kay Atty. Pueblo, tatlo ka mga motions ang gin-raise sang defense team kag una diri amo ang paghingyo sang kopya sang komunikasyon sa tunga sang ICC Chamber kag sang doctor nga assigned sa pag-examine kay Duterte.
Ika-duha, nag-request sila nga i-release ang former president bangud sa ginapatihan nila nga yara sa indi maayo nga kondisyon ang cognitive abilities sini.
Ika-tatlo, naghingyo ang defense team sang padayon nga pag-review sang cognitive kag health status ni Duterte.
Apang, gin-deny sang Pre-Trial Chamber ang requests sa pag-access sang communications kag ang paghingyo nga i-release ang anay presidente apang aprubado naman ang request para sa padayon nga medical review.
Sa issue naman sang “lack of clarity,” ginpahayag ni Atty. Pueblo nga nagasiling ang defense team nga ang nabaton nga komunikasyon ang indi maathag apang ginkwestyon ini sang Chamber kag ginpahayag nga napasa na ang medical reports kag maathag nga gin-discuss ang health condition ni Duterte.
Posible suno sa abogado nga indi makit-an sang Chamber ang balor sang argumento sang kampo sang anay presidente.
