Nagalaum ang isa ka legal expert nga matapos ang pagpresentar sang ebidensya kag testimonya sang prosekusyon sa Article I sang articles of impeachment agud tugutan ang depensa nga magpresentar sang ila bahin.
Sa interview sang Bombo Radyo kay Atty. Joenar Pueblo, President sang Philippine Arbitration Center in the Visayas, iya ginpahayag nga base sa mga ebidensya kag testimonya sang mga testigo nga na-file na, mahimo na nga may bastante nga basehan ang mga senator-judges agud tun-an kun bala responsable si Vice President Sara Duterte sa mga alegasyon batok sa iya.
Suno kay Pueblo, kun matapos ang presentasyon sang prosekusyon sa Article I, mangin madasig ang proseso bangud mahatagan sang kahigayunan ang depensa nga magsabat sa mga alegasyon kag magpresentar sang kaugalingon nga mga ebidensya kag testigo.
Dugang pa sang natungdan, posible nga ang Senado, bilang senate impeachment court, ang mahatagan man sang bastante nga tion sa pagtapos sang trial kag magboto antes matapos ang 2026, depende sa dalagan sang trial kag kalawigon sang mga presentasyon sang magtimbang nga bahin.
