May legal nga basehan ang ginpatigayon nga quorum sa sesyon sang Senado kahapon, suno sa isa ka legal expert.
Sa interview sang Bombo Radyo kay Atty. Joenar Pueblo, President sang Philippine Arbitration Center in the Visayas, iya ginpahayag nga ang ginpatigayon nga quorum nasandig sa Avelino vs. Cuenco case, kun sa diin ginakonsiderar ang kadamuon sang mga sitting senator sa paglantaw kon may nagakaigo nga mga miyembro agud makapadayon sang sesyon.
(QUOROM)
Suno kay Pueblo, bangud sang legal precedent, ginpahanugutan ang 12 ka senador nga magpatigayon sang quorum kag makapadayon sang sesyon sang Senado.
Apang suno sa iya, mahimo gihapon nga iapelar sa Korte Suprema ang isyu may kaangtanan sa quorum apang lauman ang malawig nga proseso sini kag nagakinahanglan sang igo kag makatadunganon nga rason agud mapadayon ang amo nga apela.
Dugang sini, nasulat sa rule of law nga indi mahimo nga magsobra sa tatlo ka adlaw ang pagka-adjourn sang sesyon, gani importante nga may nagatindog nga presiding officer agud masiguro ang padayon nga pagpatigayon sang mga buluhaton sang Senado.
Madumduman nga nagtambong kahapon si Senador Francis “Chiz” Escudero, nga kabahin sang Majority Group, nga nagresulta sa pag-abot sa 12 ka miyembro sang Senado kag naghatag sang dalan agud makabuo sang quorum ang mataas nga kapulungan.
