Nagpaathag ang isa ka legal expert parte sa legal nga proteksyon sang publiko batok sa pagkuha, pagkopya ukon pagpalapta sang pribado kag sexual nga litrato ukon video nga wala sang pahanugot sang tag-iya.
Sa interview sang Bombo Radyo kay Atty. Julius Daliva, sang Integrated Bar of the Philippines-Capiz Chapter, iya ginpahayag nga ang Republic Act No. 9995 ukon Anti-Photo and Video Voyeurism Act of 2009 ang nagadumili sa pagkuha sang litrato ukon video sang tawo nga nagahimo sang sexual act ukon sang iya private areas, kon ini ginhimo nga wala sang consent kag yara ang tawo sa sitwasyon nga may reasonable expectation of privacy.
Suno kay Daliva, sa idalom sang RA 9995, separado nga ginadumilian ang pag-copy, reproduce, sell, distribute ukon publish sang amo nga mga materyales kon wala sang ginakinahanglan nga pahanugot sang tawo nga yara sa litrato ukon video.
Nagpanawagan man ang natungdan sa publiko nga respetuhon ang privacy kag consent sang iban kag maghalong sa pagkuha, pag-save, pag-share ukon pag-upload sang pribado ukon sexual nga content, bangod ang paghatag sang pahanugot sa isa ka tion indi automatic nga nagakahulugan nga may pagtugot man sa pagpalapta sini sa iban.
