Nagpahanumdom ang isa ka legal expert angut sa importansya sang pag-angkon sang ihibalo sa krimen nga Estafa.
Sa interview sang Bombo Radyo kay Atty. Salvador Alba II sang Integrated Bar of the Philippines, iya ginpahayag nga ang estafa ukon pagpanunto amo ang krimen nga ginahimo paagi sa pagpangdaya kag pagkuha sang kwarta kag propedad sang iban paagi sa pagbinutig kag pagsalig.
Lakip man sa ginakabig nga estafa ang pagpromisa nga wala tuyo tumanon, paggamit sang peke nga identity, kag pagkuha sang bayad nga wala ginahatag ang serbisyo.
Suno kay Alba, daku ang papel sang pagsalig sa krimen nga estafa bangod ginahimo ini sang suspek agud mapalapit kag mapapati ang biktima sa iya ginapanghambal.
Pahayag pa niya, mahimo nga gamiton sa pagpasaka sang kaso ang mga ebidensya kaangay sang resibo, chat messages, kontrata, kag iban pa nga dokumento agud mapamatud-an ang estafa sa korte kag mahatagan hustisya ang biktima.
Nagpahanumdom man ang natungdan sa publiko nga mangin maalam kag mag-usisa antes magsulod sa bisan ano nga transaksyon, labi na kon may kaangtanan sa kwarta agud indi mangin biktima sang nasambit nga kaso.
