Ginpaathag sang isa ka legal expert ang importansya sang pag-angkon sang igibalo nahanungod sa Anti-Money Laundering Act bilang kabahin sang kampanya sang gobyerno kontra ilegal nga transaksyon kag financial crimes.
Sa interview sang Bombo Radyo kay Atty.Roland Manuel Alado sang Integrated Bar of the Philippines – Capiz Chapter, iya ginpahayag nga ang ang nasambit nga layi ang nagaalalay sa pagmonitor sa pagtago sang kwarta nga halin sa ilegal nga aktibidad kaangay sang drug trafficking, korapsyon, kidnapping kag online scams.
Suno kay Alado, importante nga mangin mabinantayon ang publiko sa paggamit sang ila bank accounts kag personal nga impormasyon agud indi ini magamit sa mga ilegal nga transaksyon nga posible magdala sang kaso ukon penalidad.
Pahayag pa sini, obligado man ang mga bangko kag financial institutions nga magreport sang mga kaduda-duda nga transaksyon agud maimbestigaran sang nagakaigo nga ahensya sang gobyerno.
Nagpahanumdom man ang natungdan sa publiko nga magreport insigada sa mga otoridad kon may nahibaluan nga suspicious nga financial transactions ukon scam operations agud malikawan ang nasambit nga insidente.
