Naghingyo ang legal team ni former President Rodrigo Duterte sa International Criminal Court nga kakason ang isa ka doctor nga gin-assign sa pag-check sa anay presidente kun mentally kag physically fit ini nga mag-atubang sa trial.
Matandaan nga nagplano ang ICC nga dapat may yara sang grupo sang mga doctor nga maga-assess sa kondisyon ni Duterte bangud 80 anyos na ini kag nagapangatubang sang kaso may kaangtanan sa pagpatay nga natabo sang siya ang alkalde sa Davao City kag nangin Presidente.
Sang Setyembre, nagpamatok ang kampo ni Duterte sa isa ka doctor, nga isa ka babaye nga neuropsychologist, sa pagpati nga indi dapat ini mangin kabahin sang panel.
Ginpaboran ini sang ICC kag ginbuslan sang lalaki nga doctor.
Apang sa subong, liwat nga nagahingyo ang kampo ni Duterte sa international tribunal nga kakason ang ini nga lalaki nga doctor.
Sa dokumento nga ginpasa sang Nobyembre 7, ginpahayag ni Nicholas Kaufman, abogado sang anay presidente, nga ang bag-o nga doctor ang dapat nga i-disqualify bangud kulang ini sa eksperyensya kag naga-share sang mga offensive posts sa social media.
Suno sa team ni Duterte, ang posts sang doctor ang nagapakita nga indi ini patas ukon neutral kag posible nga may yara ini sang political bias.
Nagapati ang kampo nga ang kaangay nga doctor ang indi dapat pagsaligan sa amo nga trabaho ilabi na nga mahimo ini maka-access sa private medical records ni Duterte.
Nagahingyo ang team sang anay presidente sa ICC nga kanselahon ang assignment sang doctor antes pa man ini maka-access sa personal health information ni Duterte.
Liwat man nga ginapa-untat temporary sang kampo ang proceedings.
Samtang, nagpabor naman ang ICC Office of the Prosecutor, ang naga-handle sang kaso batuk kay Duterte, nga kun matukiban nga ang mga offensive social media posts ang iya sang doctor, nagakadapat lang nga kakason ini bilang doctor sang anay presidente.
Nagpanawagan man ang prosecutor sa ICC nga sa sunod, dapat gina-check sang maid-id ang mga eksperto antes ang mga ini i-appoint.
Sa subong, nagapabilin sa gihapon si Duterte sa Hague Penitentiary Institution sa Netherlands, kun sa diin nahamtang ang International Criminal Court.
Nagapangatubang si Duterte sang 49 counts sang murder kag attempted murder may kaangtanan sa anti-drug campaign, apang pahayag sang prosecutor, ang matuod nga numero ang mas mataas pa.
