Ginapreparar na sang legal team ni former President Rodrigo Duterte ang pag-apelar batok sa desisyon sang International Criminal Court (ICC) Pre-Trial Chamber I agud kumpirmahon ang mga akusasyon batok sa iya may kaangtanan sa mga pagpamatay sa idalum sang anti-drug campaign sang siya pa ang alkalde sang Davao City kag presidente sang Pilipinas.
Suno kay Atty. Nicholas Kaufman, ang depensa magapangayo sang pahanugot sa pag-apelar batok sa iya gintawag nga “pinaka-bizarre” kag “Kafkaesque” nga desisyon.
Ginpanindugan sini, kaangay nga ginpaboran sang Pre-Trial Chamber ang prosekusyon kag wala ginkonsiderar ang kinamatarung ni Duterte sa patas nga hearing.
Dugang pa ni Kaufman, posible amo ini ang rason kon ngaa wala sang bisan isa ka ebidensya ang ginsambit sa footnote sang desisyon.
Samtang ginpahayag naman ni former Chief Presidential Legal Counsel nga si Atty. Salvador Panelo nga daw kaangay “pre-judged” na ang kaso.
Bilang sabat, gin-athag ni Palace Press Officer Undersecretary Atty Claire Castro nga 2017 pa sang ginpasaka ang mga kaso batok kay Duterte, antes pa man ang administrasyon ni Marcos.
Dugang pa ni Castro nga ang pagpatuman sang war on drugs ang ginhimo ni Duterte kag sang iya mga kaupdanan, kag wala man sang kahilabtanan si President Ferdinand Marcos Jr.
