Nasapwan nga wala na sang kabuhi ang kilala nga actor nga si Gene Hackman kag ang asawa sini nga si Betsy Arakawa, 64, lakip na ang ila ido sa ila nga balay sa Santa Fe, New Mexico, USA.
Ini ang ginkumpirmar sang Santa Fe County Sheriff’s Office ala 1:45 sang hapon, kahapon nga adlaw Pebrero 27, 2025.
Suno pa sa sheriff’s office, wala nila ginadudahan ang anuman nga foul play, apang wala pa natumod ang rason sang ila nga kamatayon.
Sa karon, padayon ang imbestigasyon angut sa insidente.
Samtang, kilala si Hackman nga nagbulsa sang duha ka Oscars sa iya nga 60 ka tuig nga career sa pelikula, telebisyon, kag teatro, anay man ini nga Marine kag kilala sa iya raspy nga boses.
Nangin kabahin man siya sang masobra 80 ka pelikula kag kilala sa iya nga abilidad nga maghatag sang madalom nga pag-acting sa mga karakter nga bida-kontrabida.
Nakuha ni Hackman ang una nga nominasyon para sa Academy Award sa iya nga papel bilang utod ni Clyde Barrow sa pelikula nga ”Bonnie and Clyde” sadtong 1967. Kasunod sini, liwat nga nakuha ni Hackman ang nominasyon para sa Best Supporting Actor sa pelikula nga ”I Never Sang for My Father” sadtong 1971.
Nagsikat pa ang pangalan ni Hackman sang gindala sini ang papel ni Popeye Doyle, isa ka maisog kag determinado nga detective gikan sa New York, sa pelikula nga ”The French Connection” sadtong 1971, nga naghatag sa iya sang Academy Award para sa Best Actor.
Nagdaog man ini sang Best Supporting Actor Oscar sadtong 1993 para sa iya nga papel bilang isa ka mapintas nga sheriff sa Clint Eastwood nga ”Unforgiven”. Nominado man siya para sa Academy Award sa pelikula nga ”Mississippi Burning” sadtong 1988 bilang isa ka ahente sang FBI.
Kilala nga method actor, ang mga karakter ni Hackman kasubong sang iya papel bilang kontrabida nga si Lex Luthor sa ”Superman”, kag bida bilang isa ka coach sang basketball sa ”Hoosiers” (1986). Ginkilala ang iya nga talento nga maghatag sang kadalom kag pagiging genuine sa kada papel nga ginabidahan sini.
Nagretiro ang Hollywood actor gikan sa pag-arte sa iya ika-70 ka tuig, bangud suno sa iya ang mga papel nga gina-offer na sa iya ang puro “lolo” na.
Ulihi siya nga nasubaybayan sadtong 2004 sa comedy movie nga ”Welcome to Mooseport.”
Kaangut pa sini si Hackman ang ginkasal sa duha ka babaye kag nag-angkon sang tatlo ka anak — sanday Christopher, Elizabeth Jean, kag Leslie Anne— gikan sa iya nagtaliwan nga ex-wife nga si Faye Maltese, nga nagtaliwan sadtong 2017.
Si Hackman ang nagtaliwan sa edad nga 95 kag ginbilin ang isa ka madalom nga legacy bilang isa sa mga pinaka-respetado nga aktor sa Hollywood.
