ROXAS CITY – Gin-athag sang Chairman sang Finance and Appropriations sang Sangguniang Panlalawigan ang objective sang ginpatawag nga legislative inquiry sa kontrobersiyal nga isyu nga pagkamatay sang apat ka mga pasyente sang Roxas Memorial Provincial Hospital nga yara sa Intensive Care Unit sang Disyembre sang nagligad nga tuig.
Ginpangunahan ang nasambit nga legislative inquiry sang tatlo ka mga komitiba nga ginalakipan sang Committee on Laws and Good Governance, Health kag Finance and Appropriations.
Ginpahayag ni Board Member Jonathan Sonny Besa, nga tinutuyo sang imbestigasyon nga ma-improbar ang serbisyo nga ginahatag sang ospital, kun kinahanglan bala nga magdugang sang mga nurses agud matatapan sang maayo ang mga pasyente kag indi na masulit pa ang natabo, subongman mahibaluan ang kamatuoran sa likod sang kontrobersiya.
Ginklaro man sang opisyal nga indi sila mag-imbestigar agud lamang matumod kun sin-o ang may sala ukon dapat basulon sa natabo.
Apang pananglitan nga magguwa sa imbestigasyon nga may kasaypanan ukon kapabayaan ang RMPH, ang ila sarang mahimo amo ang magrekomendar sa executive department sang ila natukiban kag nagadepende na ini sa nasambit nga departamento kun ano ang ila mangin aksyon.
Nahibaluan nga duha ka adlaw ang patigayunon nga legislative inquiry sa diin sa una nga adlaw magatambong ang pamilya sang apat ka mga biktima nga nagkalamatay kag sa ikaduha nga adlaw imbitahon naman ang mga opisyales sang ospital nga ginalakipan sang chiefs of hospital, head nurse, maintenance division sang RMPH kag iban pa.
Apang aminado si Besa nga wala pa sila nakapadala sang formal invitation sa tagdumalahan sang RMPH, bangud kinahanglan nga una mapadalhan ang gobernador.
