ROXAS CITY – Patay ang isa ka lesbian matapos nagbitay sa sulod sang gina-estaran sini nga balay sa Mckinley Ilaya, Barangay 1, Roxas City.
Mahibaluan nga nakit-an na lamang ang wala na ginhingadlan nga biktima sang boarder nga naga-arkila sang kwarto sa nasambit nga balay.
Suno sa nasambit nga boarder, tuman ini nga nakibot sang nagpadulong siya sa kusina matapos nga nakit-an sini ang nakabitay nga biktima nga may nakahigot nga nylon cord sa liog kag wala na sang kabuhi.
Mahibaluan nga naga-estar ang biktima kag ang utod sini sa ila nga tiya nga utod sang ila ginakilala nga nanay nga nag-adopt sa ila.
Tumandok sang Mindanao ang biktima kag nagatrabaho sa isa ka computer shop sa siyudad sang Roxas.
Sang mainterview sang Bombo Radyo ang abyan sang magulang sang biktima, ginpahayag sini nga ila nahibaluan nga ginbulagan ang biktima sang iya nobya kag iya gid ini nga ginbatyag.
Ginlaragway pa sini nga mahipuson nga klase sang tawo ang biktima kag masami nagaisahanon.
