ROXAS CITY – Padayon ang pagpakig-angut sang grupo nga Let’s SAVE CAPIZ sa pila ka mga pribado nga grupo kag indibidwal para sa paghugpong agud mabuligan ang mga nagakinahanglan ilabi na ang mga frontliners subong nga coronavirus disease (COVID-19) pandemic.
Ini ang ginpahayag sang focal person sang grupo nga si Atty. Maria Leobeth Deslate-Delicana sang mainterview sang Bombo Radyo.
Suno kay Delicana, sila ang nagahatag sang linkages sa mga pribado nga grupo ukon indibidwal kun paano mapalab-ot ang ila bulig sa mga natungdan nga mga frontliners.
Mahimo suno diri nga magpakig-angut sa ila grupo pinaagi sa ila facebook group.
Anuman nga sahi sang bulig kalakip ang cash, mga pagkaon, goods, personal protective equipment (PPE’s) ukon logistics ang dako nga bulig suno kay Delicana para sa mga frontliners.
Apang ginklaro sini nga wala direkta nagakadto sa Let’s SAVE CAPIZ ang mga bulig para sa frontliners kundi sila gid lamang ang nagahikot agud matigayon ini nga mahatag.
