ROXAS CITY – Kasubong ginalauman na sang presidente sang Capiz-LGBTQIAP ang pagbasura sang Korte Suprema sa petisyon nga nagaduso sang same sex marriage sa pungsod.
Ini ang ginpahayag Mr. Jonas Lumogdang sang mainterview sang Bombo Radyo.
Suno kay Lumogdang sa baylo nga baisan pa, mas maayo nga batunon na lamang ini apang nagapabilin suno sa iya nga buhi ang ila nga paglaom nga pahanugutan sang estado ang ila ginaduso nga ‘civil union’ ukon legal nga pagkilala sa same sex couples.
Importante suno sa iya nga nga respetuhon gihapon ang Simbahan apang suno diri kun indi mahimo sang Simbahan nga maproteksiyunan ang ila kinamatarong, napat-od sini nga mahimo sang estado nga mahatagan sang patas nga oportunidad ang mga ‘legal couples’ kapareho sang ginatamasa nga oportunidad sang ‘married couple’.
Apang sa subong suno kay Lumogdang, labing importante sa tanan amo ang paghatag sang pagtamod sa maayo nga pagbaton kag pagtratar sang tawo sa mga miyembro sang LGBTQIAP community.
Ginpahayag naman ni Mr. Rodel Balguma, isa ka Capizeño nga ginkasal sa kapareho sini nga lalaki sa Tennessee, USA nga ginarespeto sini ang pagbasura sang petisyon nga nagaduso sang same sex marriage sa Pilipinas.
Ginpahayag sini nga indi man sang kasal sa Simbahan ang luyag nga maangkon sang mga LGBTQIAP community members kundi ‘legal recognition’ ukon pagkilala sang estado sa isa ka same-sex couple.
Mas hatagan suno sa iya sang prayoridad sa subong sa Pilipinas ang pagdula sang ‘stereotyping’ kag ‘stigma’ sa mga LGBTQIAP members.
Suno diri nga maswerte siya bangud didto sa Amerika, mas bukas ang paminsaron sang gobyerno bangud sang tuig 2015 ginpahanugutan na ang same-sex marriage sa nasambit nga duog.
Tuig 2016 sang ginkasal si Balguma sa Estados Unidos sa iya nga partner nga nakilala sini samtang siya ang nagatrabaho pa bilang seafarer sadtong tuig 1997.
Samtang malipayon naman ang presidente sang Capiz-LGBTQIAP nga si Lumogdang sa ginapakita nga suporta sang gobyerno-probinsiyal sa ila nga grupo kag sa ila mga adbokasiya.
Tuman ang pagpasalamat sini sa ginhatag nga libre nga Kabalaka Health Card sa mga tigulang nga miyembro sang ila grupo, kahandaan sang Department of Labor and Employment (DOLE) nga maghatag sang livelihood assistance sa ila unemployed members kag paghatag sa ila sang papel sang Provincial Health Office pag-abot sa preventive-education campaign sa Human Immunodeficiency Virus-Acquired Immunodeficiency Syndrome (HIV-AIDS) awareness.
