ROXAS CITY – Nagpalab-ot sang open letter ang LGBTQIAP+ CAPIz nga nagapahayag sang suporta kay Provincial Administrator Dr. Edwin Monares nga nagabali sa kaundan sang open letter ni Board Member Wildie Apolinario nga nagahinyo sa gobernador nga i-revoke ukon i-reall ang appointment ni Monares bilang Provincial Administrator sang Capiz.
Sandig sa sulat nga pirmado ni Jonathan Lomogdang, presidente sang LGBTQIAP+ CAPIz katuyuan sang grupo nga mapalab-ot ang ila panindugan kag panan-awan sa pila ka mga kontrobersiyal nga issue nga nagakahinabo sa sosyudad.
Gindepensahan man sang grupo si Monares batuk sa akusasyon sang pila ka mga detractors sini bangud ila personal nga nakilala ang provincial administrator sang nagpakigkita sila kay Governor Esteban Evan Contreras II agud ipakigbahin ang aktibidad kag proyekto sang ila nga organisasyon nga rehistrado sa DOLE.
Nabatyagan sang grupo nga kasubong sa utod ang pagkabig sa ila ni Monares nga tuman kalayo sa mga akusasyon sang detractors sang provincial administrator nga arogante ini kag unprofessional.
Ginlaragway man sang LGBTQIAP+Capiz si Monares nga isa ka hardworking nga opisyal sang gobyerno kag tuman ka swerte ang probinsiya, bangud nakakita ini sang maalam kag kwalipikado nga administrator nga may maayo nga tagipusoon nga handa magserbe sa mga Capizeño.
Ginpanindugan pa sang grupo nga wala sang anuman nga black propaganda ang makapabag-o sa ila pagkakilala kay Monares nga bug-os ang ila suporta sa ginadalahigan nga kontrobersiya.
