Ginkalipay sang Local Government Unit (LGU) sang Dumarao, Capiz ang pag-abot sang bag-o nga fire truck nga magabulig sa pagpaayo sang serbisyo sa pagresponde sa mga insidente sang sunog kag iban pa nga emerhensiya sa banwa.
Sa interview sang Bombo Radyo kay Dumarao Mayor Mateo Hachuela, iya ginpahayag ang kalipay sa pag-abot sang bag-o nga fire truck nga mangin dugang nga suporta sa mga bombero sa pagtuman sang ila katungdanan.
Suno kay Hachuela, personal niya nila nga ginlantaw ni Vice Mayor Gley Hachuela ang bag-o nga fire truck nga ginapaabot nga makabulig sa pagpaayo sang fire protection kag emergency response services sa banwa.
Paagi sa amo nga fire truck, ginapaabot nga mas mangin episyente ang pagresponde sang mga bombero, ilabi na sa mga insidente sang sunog nga nagakinahanglan sang madasig nga aksyon agud malikawan ang paglapta sang kalayo kag ang posible nga pagdaku sang halit.
Dugang pa, ang presensya sang dugang nga kagamitan sa pagresponde sa emerhensiya importante agud mas mapalig-on ang kahandaan sang banwa sa pag-atubang sang mga insidente nga nagabutang sa peligro sang kabuhi kag pagkabutang sang mga pumuluyo.
Ginapaabot nga ang bag-o nga fire truck mangin dugang nga bulig sa pagpanalipod sa komunidad kag sa paghatag sang mas madasig nga serbisyo sa mga pumuluyo sang Dumarao, Capiz.
