Isa sa mga ginkilala ang Local Government Unit sang Dumarao, Capiz nga nakapasar sa Child-Friendly Local Governance Audit sa ginhiwat nga joint meeting sang Provincial Council for the Protection of Children (PCPC) kag Provincial Committee on Anti-Trafficking and Violence Against Women and Children (PCAT-VAWC).
Sa interview sang Bombo Radyo Kay Atty. Mayor Mateo Hachuela, iya ginpahayag nga ang aktibidad naghatag sang pagpabaskog sang kapasidad sang mga kabataan, kababaihan kag sa Indigenous People community nga sakop sang banwa.
Suno kay Hachuela, ang pondo amo ang kinhanglanon agud mapadayon ang mga programa kag proyekto sang banwa nga nagaproteher , nagadisiplina kag nagahatag sang integridad sa mga kabataan nga magahatag sang mas maathag nga direksyon kag mas matahum nga palaabuton.
Pahayag niya, dako nga butang ang pagkapasar sang Dumarao sa Child-Friendly Local Governance Audit sa diin nakit-an ang iya prayoridad nga kaayohan, kaluwasan kag insakto nga pagpadako sa mga kabataan.
Dugang pa sang natungdan, dako ang mabulig sang Local Government Unit sa paggiya sa mga kabataan agud nga samtang lamharon pa, magiyahan na ang mga ini sa insakto nga direksyon agud mag-umwad sa palaabuton.
